web analytics
У Глыбокім затрымалі журналістаў » article » За правы чалавека

У Глыбокім затрымалі журналістаў

28 November 2013 | admin |

Milicyjanty26 лістапада на ўезьдзе ў Глыбокае затрымалі незалежных журналістаў Вячаслава Пяшко і Насту Рэзьнікаву. Машыну, якой кіраваў Пяшко, спынілі на ўезьдзе ў горад супрацоўнікі ДАІ. Праверыўшы дакумэнты, міліцыянты спачатку сказалі, што іх насьцярожвае нумар кузава машыны. Пасьля праверылі багажнік і папрасілі праехаць зь імі ў РУУС, бо вонкава машына і яе пасажыры нібыта падыходзілі пад апісаньне махляроў у вышуку.

Спачатку на размову выклікалі Пяшко, а пасьля – Рэзьнікаву. Прыкладна праз паўгадзіны абаіх вызвалілі, перапісаўшы пашпартныя дадзеныя і нумары тэлефонаў. Гутарыў зь імі старшы опэрупаўнаважаны Мікалай Кватэра.

«Выглядала ўсе даволі падазрона», – падзяліўся з прэс-службай ГА “БАЖ” Вячаслаў Пяшко пасьля вызваленьня. На просьбу журналістаў паказаць “арыенціроўку” – апісаньне прыкмет злачынцаў, на падставе якіх іх затрымалі, – міліцыянты прад’явілі нейкі непераканаўчы дакумэнт на кампутары з агульным апісаньнем мужчыны “эўрапейскай зьнешнасьці”. Раздрукаваць дакумэнт адмовіліся.

Журналісты Вячаслаў Пяшко і Наста Рэзнікава здымалі відэарэпартажы для сайту газэты “Новы час” пра мясцовыя сацыяльныя праблемы. Тэмай увагі журналістаў быў дом №142 на вуліцы Віленскай (Леніна) у Глыбокім, жыхары якога дамагаюцца ад уладаў капітальнага рамонту. Таксама яны рыхтавалі відэаматэрыял пра дарогу Глыбокае – Дзеркаўшчына, подпісы за рамонт якой зьбіраюць вяскоўцы.

Паводле Беларускай асацыяцыі журналістаў і Весткі.інфо

Прабачце, камэнтары не дазволеныя.