web analytics
У Віцебску скінхэды перасьледуюць туркмэнскіх студэнтаў? » article » За правы чалавека

У Віцебску скінхэды перасьледуюць туркмэнскіх студэнтаў?

31 October 2013 | admin |

Turkmenskija studentyНа сайце «Хроніка Туркмэністану» зьявілася нататка «Туркмэнскія студэнты просяць ратунку», дзе паведамляецца, што на студэнтаў з Туркмэністану, што навучаюцца ў Віцебскім дзяржаўным унівэрсытэце імя П. М. Машэрава, на працягу апошніх двух тыдняў палююць мясцовыя скінхэды. Далей у тэксьце гаворыцца наступнае: «Групы маладых хлопцаў зьбіваюць як хлопцаў, гэтак і дзяўчат - туркмэнскіх студэнтаў. З-за таго, што апошнія цяпер не могуць выйсьці на вуліцу, ужо на працягу шасьці дзён навучальны працэс ва ўнівэрсытэце спынены».

«Паводле слоў студэнтаў, калі яны, аб’яднаўшыся, спрабуюць даць адпор мясцовым групоўкам, міліцыя стае на бок скінхэдаў. Туркмэнская амбасада ў Беларусі не рэагуе на зварот студэнтаў», - піша «Хроніка Туркмэністану».

На факультэце навучаньня замежных грамадзян ВДУ і ў дэканаце паведамілі, што, цытуем: «Ніякага прыпыненьня не было. Навучальны працэс ідзе поўным ходам. Напружанасьці ў супольнасьці замежных студэнтаў мы не назіраем». Аднак ад далейшых камэнтароў па тэлефоне прадстаўнікі факультэту адмовіліся. Няма інфармацыі, якая пацьвярджала б канфлікты на міжнацыянальнай глебе, і ў супольнасьцях студэнтаў Туркмэністану ў сацыяльных сетках.

Нагадаем, надоечы зьявілася паведамленьне пра закрытую вечарыну, куды плянавалася дапускаць толькі «туркмэнскіх студэнтаў і рускіх дзяўчат». Інтэрнэт-супольнасьць Беларусі была абураная дыскрымінацыйнымі ўмовамі імпрэзы, і адміністрацыя клюбу яе адмяніла.

Народныя навіны Віцебска

Прабачце, камэнтары не дазволеныя.